श्रीमती रश्मि शुक्ला, सदस्य, लोक आयुक्त, महाराष्ट्र राज्य

श्रीमती रश्मि शुक्ला यांनी सन 1988 मध्ये भारतीय पोलीस सेवेत (IPS) प्रवेश केला. भारतीय पोलीस सेवेमधील 37 वर्षांहून अधिक काळाच्या त्यांच्या प्रदीर्घ आणि उल्लेखनीय कारकिर्दीत त्यांनी महाराष्ट्र राज्य पोलीस दल तसेच केंद्रीय सशस्त्र पोलीस दलांमध्ये विविध महत्त्वपूर्ण पदांवर कार्य केले आहे.

आपल्या प्रदीर्घ आणि उल्लेखनीय सेवाकाळात त्यांनी मुंबई शहर, सोलापूर शहर, नागपूर शहर आणि नागपूर ग्रामीण येथे पोलीस उपायुक्त / पोलीस अधिक्षक म्हणून कार्य केले. तसेच त्यांनी कारागृह, महिलांवरील अत्याचार प्रतिबंधक विभाग आणि कायदा व सुव्यवस्था या क्षेत्रांत पोलीस उपमहानिरीक्षक म्हणून जबाबदाऱ्या सांभाळल्या. त्यानंतर प्रशिक्षण व विशेष पथके, कायदा व सुव्यवस्था आणि महाराष्ट्र राज्य गुप्तवार्ता विभाग येथे विशेष पोलीस महानिरीक्षक / पोलीस सहआयुक्त म्हणून त्यांनी काम केले.

त्यांनी राज्य गुप्तवार्ता विभाग, महाराष्ट्र राज्य येथे अपर पोलीस महासंचालक / आयुक्त म्हणून तसेच पुणे शहराच्या पोलीस आयुक्त म्हणूनही कार्यभार सांभाळला. केंद्र स्तरावर त्यांनी केंद्रीय राखीव पोलीस दल (CRPF), हैदराबाद येथे अतिरिक्त महासंचालक म्हणून सेवा बजावली. तसेच भारत-नेपाळ आणि भारत-भूतान सीमांच्या सुरक्षेची जबाबदारी असलेल्या सशस्त्र सीमा बलाचे (SSB), नवी दिल्ली येथे महासंचालक म्हणून त्यांनी नेतृत्व केले.

सशस्त्र सीमा बलाच्या महासंचालकपदावर कार्य केल्यानंतर त्यांनी जानेवारी, 2024 ते 3 जानेवारी, 2026 या कालावधीत महाराष्ट्र पोलीस दलाच्या पोलीस महासंचालक म्हणून नेतृत्व केले.

त्यांच्या उल्लेखनीय कारकिर्दीत गुप्तवार्ता, शहरी पोलीस व्यवस्था, कायदा व सुव्यवस्था, अंतर्गत सुरक्षा आणि धोरणनिर्मिती या क्षेत्रांतील व्यापक अनुभवाचा ठसा उमटतो. महाराष्ट्र पोलीस दल तसेच सशस्त्र सीमा बल या राज्य पोलीस दल आणि केंद्रीय सशस्त्र पोलीस दलाचे नेतृत्व करणाऱ्या त्या एकमेव महिला IPS अधिकारी आहेत.

उत्कृष्ट आणि उल्लेखनीय सेवेसाठी त्यांना राष्ट्रपती पोलीस पदक (विशिष्ट सेवा आणि गुणवत्तापूर्ण सेवा) तसेच महासंचालकांचे प्रशस्तीचिन्ह (DG’s Insignia) यांसारख्या सन्मानांनी गौरविण्यात आले आहे.

श्रीमती रश्मि शुक्ला यांची 14 ऑगस्ट 2026 रोजी सदस्य, लोकआयुक्त, महाराष्ट्र राज्य या पदावर नियुक्ती करण्यात आली आहे.